thams cad la sman pa'i slad du bdag cag kun gyis bsrung zhing rim gror bgyi/ rtag par gzungs su gzung zhing mi bskyud par bgyi/ yi ger bri ba dang / bklag pa dang / mchod pa'i las rnams kyang bgyi ste ma 'ongs pa'i dus na sems can gang la las chos kyi rnam grangs 'di
thos shing khong du chud nas ngan song ngan 'gro sems can dmyal ba la sogs pa dang / sdig pa thams cad las thar bar 'gyur bar bcom ldan 'das kyis gsungs pas na/ bdag cag rnams kyis bcom ldan 'das kyi bka' drin spyi bos blangs pa'i slad du gsang
sngags kyi cho ga 'di dag rim gror bgyid/ btsun par bgyi/ gus par bgyi/ rin po che'i 'du shes gzhag par bgyi/ rgya cher 'phel bar bgyi/ bcom ldan 'das kyi zhal dang 'dra bar blta bar bgyi ste/ nam du yang nub par mi 'gyur zhing ci nas kyang rgyas par bgyi ba'i
slad du nan tan bgyi bar 'tshal lo/ /de skad ces gsol ba dang / bcom ldan 'das kyis bka' stsal pa/ skyes bu dam pa rnams dam tshig la gnas pas gsang sngags kyi cho ga 'di dag bsrung ba dang / rim gror bya ba dang / yongs su bzung bar khas blangs pa ni
legs so legs so shin tu yang legs so/ /bcom ldan 'das kyis de skad ces bka' stsal nas/ thams cad dang ldan pa'i 'khor de dag yi rangs te/ bcom ldan 'das kyis gsungs pa la mngon par bstod do/ /'phags pa 'od zer dri ma med pa rnam par dag pa'i 'od
ces bya ba'i gzungs rdzogs // //rgya gar gyi mkhan po bid+yA ka ra sid+ha dang / zhu chen gyi lo ts+tsha ba ban+de dpal gyi lhun po'i sdes bsgyur cing zhus te gtan la phab pa'o/ /jo bo a ti sha dang dge bshes 'brom ston pas sngags rnams dag par bsgyur ba'o// //
@#/ /rgya gar skad du/ saman+ta mu kha pra be sha ra sh+mi bi ma loSh+NI Sha bra b+hAs sarba ta thA ga ta hr-i da ya sa ma ya bi lo ki tanA ma d+hA ra NI/ bod skad du/ kun nas sgor 'jug pa'i 'od zer gtsug tor dri ma med par snang ba de bzhin gshegs pa thams cad kyi snying po dang dam tshig la rnam

110a - 111a