gzhan yang chos brgyad 'thob par 'gyur te brgyad gang zhe na/ 'gum pa'i dus su 'phags pa spyan ras gzigs dbang phyug dge slong gi gzugs su mngon sum du zhal ston par 'gyur ro/ /bde bar 'chi ba'i dus byed par 'gyur ro/ /lta ba 'khrul par mi 'gyur
ro/ /lag pa mi g.yob pa dang rkang pa mi g.yob pa dang bshang gci ma mchis pa dang khri'i steng du 'chi ba'i dus byed par 'gyur ro/ /dran pa shin tu nye bar gnas par 'gyur ro/ /kha bub tu 'chi ba'i dus byed par mi 'gyur ro/ /'gum pa'i dus na yang spobs pa mi bas par 'gyur ro/ /
de yang sangs rgyas kyi zhing gang du smon pa der skye bar 'gyur zhing dge ba'i bshes gnyen dang yang 'bral bar mi 'gyur ro/ /nyin gcig bzhin du dus gsum du lan gsum du bzlas brjod bgyi'o/ /chang dang sha dang kun dong dang ke'u dang sgog skya dang / 'dres pa dang / lhag rol dang / /
'di rnams khyad par du don du gnyer bas spang bar bgyi'o/ /don yod pa'i zhags pa'i snying po'i chos kyi rnam grangs 'di yang sems can rnams la mthu mchis pa dang / mthu ma mchis par 'tshal bar bgyis nas bsgrag par bgyi'o/ /slob dpon gyis dpe mkhyud mi bgyi'o/ /
'di ltar dri ma dang bral zhing phrag dog dang ser sna spangs pa ni/ byang chub sems dpa' rnams lags te/ sems can rnams kyi don bgyi ba'i slad du sangs rgyas kyi byang chub 'thob par 'gyur bas/ byang chub sems dpa' rnams kyi tshogs kyi nang du gtogs so/ /byang chub
ces bgyi ba ni shes rab lags/ sems dpa' zhes bgyi ba ni thabs lags te/ chos 'di gnyis sems can rnams kyi don bgyi ba'i slad du kho nas thob pa lags so/ /gal te bcom ldan 'das kyis bdag la rjes su gnang na/ 'di ltar bdag gis snying po 'di
de bzhin gshegs pa'i spyan sngar 'khor bzhi rnams dang gzhan sdig pa spyod pa rnams kyi don dang / sman pa dang bde ba'i slad du bsgrag par bgyi'o/ /de nas bcom ldan 'das kyis byang chub sems dpa' 'phags pa spyan ras gzigs dbang phyug la 'di skad ces bka' stsal to/ /

3b - 4b