can su yang rung bas/ don yod pa'i zhags pa'i snying po'i ched du yar ngo'i tshes brgyad la smyung ba bgyis te/ gzhan mi smra bar don yod pa'i zhags pa'i snying po lan bdun bzlas brjod bgyid na/ bcom ldan 'das des tshe 'di nyid la phan yon nyi shu rtsa gcig 'thob par 'gyur te/ /
nyi shu rtsa gcig gang zhe na 'di lta ste/ de'i lus la nad rnams 'byung bar mi 'gyur ro/ /de'i lus la las kyi dbang gis nad rnams byung na yang myur du zhi bar 'gyur zhing / lus mdangs dang ldan pa dang yid du mchi bar 'gyur ro/ /skye bo mang po'i snying du sdug pa dang / dbang po
sbas par 'gyur ro/ /de'i don rnams 'grub par 'gyur ro/ /de'i don grub pa yang chom rkun gyis mi 'phrogs te/ zhugs kyis mi 'tshig chab kyis mi 'tshal rgyal po'i mthus dbrog par rngo mi thogs par 'gyur ro/ /de'i las kyi mtha' rnams rgyas par 'gyur te/ ser bas ma lags
so/ /chab kyi 'jigs pa 'byung bar mi 'gyur te/ rlung dang char gyi 'jigs pa ma lags so/ /don yod pa'i zhags pa'i snying po thal ba'am/ chu la lan bdun bzlas brjod bgyis nas/ zhing gi phyogs mtshams dang steng 'og tu bcing ba bgyis na gnod pa thams cad nye bar zhi bar
'gyur ro/ /gzi brjid dang mdangs 'phrogs par rngo mi thogs par 'gyur zhing sems can thams cad kyi snying du sdug pa dang yid la 'thad par 'gyur ro/ /de la dgra'i 'jigs pa 'byung bar mi 'gyur ro/ /de la dgra'i 'jigs pa byung yang myur du zhi bar 'gyur ro/ /de la mi ma lags pa'i
'jigs pa 'byung bar mi 'gyur te/ byad kyi 'jigs pa ma lags mkha' 'gro ma'i 'jigs pa ma lags te/ de la nyon mongs pa dang nye ba'i nyon mongs pa drag po 'byung bar mi 'gyur ro/ /me dang mtshon dang / dug gis 'gum par mi 'gyur ro/ /de la yang lha rnams kyis rtag tu
rgyun mi 'chad par bsrung ba dang / skyob pa dang sbed pa'i phyir gnas par 'gyur ro/ /gang dang gang du skye bar 'gyur bar byams pa dang snying rje dang dga' ba dang btang snyoms dang 'bral bar mi 'gyur te/ de la phan yon nyi shu rtsa gcig po 'di dag 'thob par 'gyur lags so/ /

3a - 4a