bklag par bya'o/ /lan re re zhing mchod rten gyi dbur mchod cing rab tu gnas par bya'o/ /stong phrag gcig tu klog pas dbus kyi mchod rten gyi dbur lag pa bskyod cing mchod par bya'o/ /me tog dang / bdug spos dang / mar me dang / dri chab dang / lha bshos la
sogs pa mchod pa thams cad stong phrag so sor mchod rten gyi phreng ba'i rnam par byas nas mchod pa bya'o/ /ji srid yongs su ma rdzogs pa de srid du mar me'i phreng ba rlung gis mi nyams pa sbar bar bya'o/ /mnyam par gzhag cing gtsang sbras rab tu 'jug par bya'o/ /de ltar byas
na zhag bdun pa'i tshe lo bdun du 'tsho bar 'gyur ro/ /lo bdun pa'i tshe ni de ltar tshe mchog 'thob cing nad las rnam par grol nas lo brgyar 'tsho bar 'gyur ro/ /dus ma yin pa'i 'chi ba yang thams cad du rnyed par mi 'gyur ro/ /de lta bu'i nye bar spyod pa'i rim pa las gzhan du
byas na de yis 'grub pa ma yin no/ /rab tu byed pa dang po'o// //rtog pa 'di yang dag pa'i dge ba'i bshes gnyen sdom brtson dam pa 'dul ba'i gtsug lag la zla med par smra ba ne'u mkhan po'i gsung bzhin du/ mang du thos pa'i lots+tsha ba gnas brtan dpal nyi
ma rgyal mtshan bzang pos dpal thar pa gling gi gtsug lag khang du rang gis bsgyur ba'o// @##/ /rgya gar skad du/ sa man+ta mu kha pra be sha rash+mi bi ma loSh+NI Sha pra b+hA sa sarba ta thA ga ta hr-i da ya sa ma ya bi lo ki te nA ma d+hA ra NI/ bod skad du/
kun nas sgor 'jug pa'i 'od zer gtsug tor dri ma med par snang ba de bzhin gshegs pa thams cad kyi snying po dang dam tshig la rnam par lta ba zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /de nas bcom ldan 'das dga' ldan gyi lha'i
gnas na/ byang chub sems dpa'i dge 'dun chen po dang / zham ring ba lha'i tshogs chen po dang / tshangs pa dang / khyab 'jug dang / dbang phyug chen po la sogs pa'i lha rnams dang thabs cig tu bzhugs te/ 'khor mang po tshogs pa la bcom ldan 'das pha rol tu phyin pa

249b - 250b