'gal bar bya ba ma yin pa'o/ /nad thams cad dang / dug thams cad dang / sdang ba thams cad dang / 'jigs pa thams cad dang / yams kyi nad thams cad dang / 'thab pa dang / rtsod pa thams cad dang / gnod pa dang / nad 'go ba dang / 'khrug pa
thams cad kyis 'gal bar bya ba ma yin pa'o/ /kun dga' bo gang gis rig sngags kyi rgyal mo rma bya chen mo 'di las 'gal bar byas na lag na rdo rjes de'i mgo bo tshal pa bdun du 'gems par 'gyur ro/ /sangs rgyas dang / byang chub sems dpa' dang / rang sangs rgyas
dang / nyan thos thams cad kyi gzi brjid kyis de'i snang ba ma rungs par 'gyur ro/ /sems ma rungs par 'gyur ro/ /'phags pa'i gang zag rnams bslus par 'gyur ro/ /rgyal po chen po bzhi po dag gis kyang gshur zhes bya ba la thug gi bar gyi gsang sngags
rnams kyis de la sdug bsngal chen po byed par 'gyur ro/ /lha rnams kyi dbang po brgya byin yang sum cu rtsa gsum pa'i tshogs kyis bskor te/ rdo rjes de'i mgo 'gems par 'gyur ro/ /tshangs pa'i gzi brjid kyis kyang de'i 'byor pa thal bar rlog par 'gyur ro/ /
kun dga' bo su zhig gis rig sngags kyi rgyal mo rma bya chen mo 'dis bsrung ba byas sam/ skud pa btags na de bsad pa'i rigs pa ni chad pas bral bar 'gyur ro/ /chad pas bcad pa'i rigs pa ni gzhu btsog pas so/ /gzhu btsog pa'i rigs pa ni spyo bas
so/ /spyo ba'i rigs pa ni dam bca' bas so/ /dam bca' ba'i rigs pa ni spu zing zhes bya bas so/ /spu zing zhes bya ba'i rigs pa ni de bzhin du thar bar 'gyur ro/ /de la rgyal po'i 'jigs pa 'byung bar mi 'gyur te/ chom rkun gyi 'jigs pa mi 'byung / me'i
'jigs pa mi 'byung ngo / /chus 'chi ba'i dus byed par mi 'gyur ro/ /de'i lus la dug gis mi tshugs te/ mtshon gyis kyang ma yin no/ /bde bar gnyid kyis log cing bde bar sad par 'gyur ro/ /bde ba dang / gnod pa med pa dang / 'jigs pa med par 'gyur ro/ /

115a - 116a