rnam par gnas/ /lha dang sngags sogs rtogs pa des/ /rtog pa dman pa mnan pa yin/ /nam mkha' lta bur rtog med la/ /'jig rten dor ni rtog pas sprul/ /gdul bya sdang sogs sems 'khrugs la/ /nga ni snying rjes sdang bar mdzad/ /khro sogs bsal du med
gyur na/ /khro bor da ni ci phyir 'gyur/ /dang po rnal 'byor 'tshe ba bcom/ /de phyir rig sngags sbyor ba rnams/ /rgyud kun du ni gsungs pa yin/ /'tshe ba bcom nas dag pa ni/ /sems dag pa ni bde ba yin/ /gdug pa'i sbyor ba phrogs pas na/ /bde bar byang chub lam brten
la/ /rdo rje sku nyid 'gyur med la/ /bdag gis rig pa'i ye shes de/ /lus can de yi 'bras bu'o/ /ji ltar shel ni dzam bu ka'i/ /me tog gis ni gzhan du snang / /de bzhin rtog med rig pa yang / /khro bo'i dbang phyug 'dir snang nas/ /ji ltar 'dul 'gyur sprul pa yis/ /rgyun
mi 'chad par khro bor snang / /snying rje med na 'bras bu nyams/ /'gro la phan btags gnod bsal na/ /rang sems dag pas 'bras bu 'grub/ /rgyu dang 'bras bu'i sgrib pa rnams/ /byang chub sems kyis ring du spang / /'di ni 'khor ba 'jig par nges/ /brtan dang g.yo ba'i sgrib pa
rnams/ /blo mnyam dus na gnyen po dang / /mi mthun nam mkha' ltar yangs pa/ /lhun gyis grub 'bras phyi ma yin/ /ji srid rtog pa'i dri ma yod/ /de srid 'bad de rig pa bsgom/ /sems sbyong snga ma rig pa yis/ /rgyud nyid du ni 'dod pa yin/ /gang la sems ni dri med pa/ /
rtog pa'i dri mas nag por byas/ /de la spang ba'i blo med pa'o/ /rtog pa'i blo can 'khor ba yin/ /de phyir shAkya'i rigs can rnams/ /sa 'og tu rgyu ba'i klu'i rtog pa la sogs pa tshar gcad pa'i phyir sbyor ba rnams la gus par bya'o/ /rdo rje sa gsum du rgyu ba las rtog pa lnga pa
rdzogs so// //dbang phyug dam pa'i mnga' bdag khri srong lde btsan gyi bka' khrims su/ dpal dpe med lhun gyis grub pa'i gtsug lag khang du rgya gar gyi mkhan po ku mA ra badzra dang / ra byid lo ts+tsha bas bsgyur ba'o// //

176a - 177a