sangs rgyas bcom ldan 'das ni shes rab dpag tu med pa'o/ /sangs rgyas bcom ldan 'das rnams kyi spyod pa tshad med pa'o/ /sangs rgyas bcom ldan 'das kyis gdul bya'i skye bo tshad med pa rnams snod du gyur par mdzad pa'o/ /sangs rgyas bcom ldan 'das rnams ni mi mnyam
pa dang mnyam pa'i ye shes gang yin pa'o/ /sangs rgyas bcom ldan 'das rnams ni mi mnyam pa dang mnyam pa'i rdzu 'phrul dang yang dag par ldan pa'o/ /sangs rgyas bcom ldan 'das rnams ni mi mnyam pa dang mnyam pa'i smon lam dang yang dag par ldan pa'o/ /lha'i dbang po de'i
phyir sangs rgyas bcom ldan 'das rnams kyis snod ji lta ba de ltar sems can rnams kyi don mdzad pa dang / gdul bya ji lta ba de ltar sems can rnams kyi don mdzad pa dang / mos pa ji lta ba bzhin du sems can rnams kyi don mdzad pa yin no/ /zhes shes par bya ba 'di la 'dir
the tshom dang som nyi dang yid gnyis mi bya'o/ /gang de bzhin gshegs pa rnams kyis gdul bar mi 'gyur ba 'di ni gnas ma yin no/ /de nas lha'i dbang po rang gi stan las langs nas slar yang bcom ldan 'das la mchod pa rgya che zhing che ba byas te phyag 'tshal nas bcom ldan 'das la 'di skad
ces gsol to/ /sems can thams cad la phan par bya ba'i phyir dang / rjes su brtse bar bya ba'i phyir dang / snying rje dang bcas par bya ba'i phyir dang / brtse ba chen po dang bcas par bya ba'i phyir dang / bsam pa thams cad yongs su rdzogs par bgyi ba'i phyir bcom ldan 'das bdag spobs
pa bskyed du gsol/ bde bar gshegs pa bdag spobs pa bskyed du gsol/ bcom ldan 'das sum cu rtsa gsum pa'i lha'i rigs 'di nas lha'i bu nor bu dri ma med pa'i 'od ces bgyi ba zhig shi 'phos shing dus las 'das nas dgung bdun lon lags na/ bcom ldan 'das de gang du skyes
shing / bde ba'am sdug bsngal gang myong bar 'gyur ba de bcom ldan 'das lung bstan du gsol/ bde bar gshegs pa lung bstan du gsol/ bcom ldan 'das kyis bka' stsal pa/ lha'i dbang po de'i dus dang skabs su bab par shes na nyon cig /lha'i dbang pos gsol pa/

97a - 98a