sems dpa' sems dpa' chen po'i dge 'dun mtha' yas shing mu med pa rnams kyis bsti stang du byas/ bla mar byas/ mchod cing rjed par byas/ shin tu phul du byung bar byas te/ 'khor gyi tshogs chen po'i dbus su tshangs pa chen po pad+ma'i gdan la bzhugs shing ngan song
thams cad yongs su sbyong ba zhes bya ba'i ting nge 'dzin la snyoms par zhugs so/ /de ma thag nyid du ngan song gsum gyi rgyud rnam par grol bar byed pa zhes bya ba byang chub sems dpa' chen po'i 'od zer 'phro ba dang sdud pa du ma'i phreng ba rang gi mdzod spu nas phyung ste/ des stong gsum gyi stong chen po'i
'jig rten gyi khams kun du snang bar byas so/ /kun du snang bar byas pa des sems can thams cad kyi sems nyon mongs pa'i 'ching ba las bkrol te/ yang dag pa so so so sor thob par byas shing dga' ba'i tshal yang kun du snang bar byas te/ mchod pa'i sprin sna tshogs pa rnams kyis mngon par
mchod nas lan brgya phrag stong du bskor ba byas te mgo bos phyag 'tshal nas/ bcom ldan 'das kyi spyan sngar nor bu dri ma med pa'i steng du 'khod de 'di skad ces gsol to/ /e ma ho sangs rgyas e ma ho sangs rgyas chos/ /e ma ho sangs rgyas mdzad pa shin tu legs/ /gang phyir bdag cag ngan
song yongs su sbyangs/ /byang chub spyod pa nyid la rab tu bzhag /de nas lha'i dbang pos bcom ldan 'das la lan brgya phrag stong du bskor ba byas te phyag 'tshal nas/ bcom ldan 'das la 'di skad ces gsol to/ /bcom ldan 'das gang gi slad du sangs rgyas kyi 'od zer kun du snang bas ngan song kun
las rnam par bkrol nas rnam par grol ba'i lam la rab tu bzhag pa ni bcom ldan 'das ngo mtshar che'o/ /bde bar gshegs pa ngo mtshar che'o/ /bcom ldan 'das kyis bka' stsal pa/ lha'i dbang po 'di ni ngo mtshar mi che ste/ sangs rgyas bcom ldan 'das rnams ni tshad med pa'i bsod nams
kyi tshogs rnams legs par bsags pa'o/ /lha'i dbang po yang dag par rdzogs pa'i sangs rgyas rnams ni dpag tu med pa'i yon tan rin po che'i 'byung gnas su gyur pa'o/ /lha'i dbang po yang dag par rdzogs pa'i sangs rgyas rnams ni tshad med pa'i thabs yongs su rdzogs pa'o/ /lha'i dbang po

96b - 97b