@##/ /rgya gar skad du/ /sarba durga ti pa ri shod+ha na te dzo rA dza s+ya ta thA ga ta s+yA r+ha te saM mya k+saM bud+d+ha s+ya ka lpai ka de sha nA ma/ /bod skad du/ /de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba gzi brjid kyi rgyal po'i brtag pa phyogs gcig pa zhes bya ba/
bcom ldan 'das dpal shAkya seng ge la phyag 'tshal lo/ /'di skad bdag gis thos pa dus gcig na/ bcom ldan 'das lha thams cad kyi mchog dga' ba'i tshal na bzhugs te/ nor bu dang gser gyi shing lo ma dang / yal ga dang / lcug mar bcas pa'i sdong po dang / shing gel pa dang / sman
dang / me tog ka mal dang / me tog ut+pa la dang / me tog kar+Ni kA dang / me tog bak+kul dang / me tog ti la ka dang / me tog a sho ka dang / me tog man+dA ra ba dang / me tog man+dA ra ba chen po la sogs pa me tog rnam pa sna tshogs pas nye bar mdzes pa/ dpag bsam gyi shing rnams kyis yang dag par
brgyan pa/ rgyan sna tshogs kyis rnam par spras pa/ bya'i tshogs sna tshogs skad snyan pa 'byin pa/ rnga dang / rnga mu kun+da dang / gling bu dang / rnga b+hi ri la sogs pa'i sgra sgrogs pa/ brgya byin dang / tshangs pa la sogs pa dang / lha'i bu rnam pa sna tshogs pa rnams rnam par rtse ba/ sangs rgyas
dang byang chub sems dpa' thams cad kyis byin gyis brlabs pa na'o/ /brgya byin dang tshangs pa la sogs pa'i lha thams cad dang / rig pa 'dzin pa dang / lha'i bu mo 'khor bye ba khrag khrig brgya stong phrag brgya stong rnams dang / gnod sbyin dang / srin po dang / lha ma yin dang / nam mkha' lding dang /
dri za dang / /mi 'am ci dang / lto 'phye chen po dang / klu la sogs pa 'khor rnam pa sna tshogs pa du ma dang / byang chub sems dpa' sems dpa' chen po bye ba khrag khrig brgya stong phrag brgyad rnams la 'di lta ste/ byang chub sems dpa' sems dpa' chen po blo gros spobs pa dang / blo gros mi g.yo ba dang /
blo gros yangs pa dang / kun du blo gros dang / blo gros mtha' yas pa dang / kun nas legs pa'i blo gros dang / blo gros ka ma la dang / blo gros chen po dang / /blo gros lha rdzas dang / /blo gros sna tshogs pa dang / blo gros ma lus pa dang / kun du bzang po ste/ de dag la sogs pa phyir mi ldog pa'i byang chub

96a - 97a