@#/ /rgya gar skad du/ sarba durga ti pa ri shod+ha na te dzo rA dza ta thA ga tA r+ha te saM myak+saM bud+d+ha s+ya kalpa nA ma/ bod skad du/ de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba gzi brjid kyi
rgyal po'i brtag pa zhes bya ba/ bam po dang po/ dpal rdo rje sems dpa' la phyag 'tshal lo/ /'di skad bdag gis thos pa dus gcig na/ bcom ldan 'das lha'i tshogs thams cad kyi dga' ba'i tshal mchog tu yid du 'ong ba na/ nor bu dang /
gser dang / gser gyi shing yal ga dang / lcug mar bcas pa dang / shing gel pa dang / sman dang / me tog ka ma la dang / ut+pal dang / kar+Ni ka dang / bak+ku la dang / ti la ka dang / a sho ka dang / man dA ra ba dang / man dA
ra ba chen po la sogs pa sna tshogs pa dang / dpag bsam gyi shing rnams kyis mdzes par byas shing / /rgya sna tshogs kyis brgyan pa/ bya sna tshogs mang po skad snyan 'byin pa/ rnga dang / cang te'u dang / ker ko dang / gling bu dang / rnga bo che la
sogs pa'i sgra grag pa/ brgya byin dang / tshangs pa la sogs pa'i lha dang / lha'i bu mo sna tshogs rnam par rtsen pa/ sangs rgyas dang / byang chub sems dpa' thams cad kyis byin gyis brlabs pa na/ brgya byin dang / tshangs pa la sogs pa lha
dang / rig pa 'dzin pa dang / lha'i bu mo 'khor bye ba khrag khrig brgya stong phrag du ma dang / gnod sbyin dang / srin po dang / lha ma yin dang / dri za dang / mi 'am ci dang / lto 'phye chen po dang / klu la sogs pa 'khor du ma dang / byang chub sems
dpa' sems dpa' chen po bye ba khrag khrig brgya stong phrag brgyad la/ 'di lta ste/ byang chub sems dpa' sems dpa' chen po blo gros tshad med pa dang / blo gros mi g.yo ba dang / blo gros yangs pa dang / kun tu blo gros dang / blo gros mtha' yas

58a - 59a