'thung rtsa ba'i sngags yin no/ /sngags kyi rgyal po 'di nyid kyi/ /mthu chen nyon cig mA ma kI/ /lan cig tsam gyis sngags bzlas na/ /skad cig 'jig rten gsum 'jig go/ /khams gsum ma lus pa rnams kyang / /zos par byed par the tshom med/ /de yis
'dod pa thams cad sbyin/ /dpal ldan khrag 'thung mnyam 'gyur ro/ /rdo rje bdud rtsi bde chen po/ /bcom ldan rdo rjes de gsungs so/ /de bzhin gshegs pa thams cad kyi sku dang gsung dang thugs kyi rdo rje can rdo rje bdud rtsi bde ba chen po'i rgyud las dpal ldan khrag 'thung bskyed
pa bstan pa zhes bya ba le'u brgyad pa'o// //de nas bdud rtsi 'khyil pa yis/ /gzugs ni yang dag bshad par bya/ /zhal gsum pa la phyag drug ste/ /drag po nag po dud pa'i 'od/ /'od zer phreng ba 'khrugs pa dang / /gtum mos spyan ni dmar po can/ /dmar
ba'i smin ma ag tshom 'bar/ /drag chen po ni zil gyis gnon/ /phyag na dgra sta bsnams brtson pa/ /gtun shing rdo rje zhags pa dang / /g.yon gyi phyag gi sdigs mdzub kyis/ /sdang ba thams cad sdigs par byed/ /ral gri phyag mtshan bsgom par bya/ /rig ma brgyad dang
mnyam ldan zhing / /sgo srungs dang yang yang dag ldan/ /gsang ba'i pad+ma bsgom byas te/ /'dab mar rig ma brgyad ni bkod/ /bdud rtsi ma dang bdud rtsi zhal/ /bdud rtsi can dang bdud rtsi spyan/ /grangs med ma dang gzugs bzang ma/ /mdzes pa'i gzugs can bde grub ma/ /
thams cad zhal gsum phyag drug ste/ /phyogs dang mtshams la dgod par bya/ /phyag gis pad+ma bsnams par brtson/ /de dag lha mo gar byed nas/ /sna tshogs gzugs rnams mchog sbyin ma/ /bzhad cing rol par mdzad byed do/ /sngags kyi rgyal po dbyung bar bya/ /rnam
par snang mdzad yang 'bul nas/ /tshig 'di yis ni yongs su dgod/ /dang po yi ni gnyis pa ste/ /stong pa nyid ni gdan ldan pa/ /stong pas steng nas gnon pa'i sngags/ /mtha' nas swA hA sbyor byed do/ /gtan du shin tu dga' 'byor nas/ /bdud rtsi bdud rtsi phyung nas su/ /bdud

24b - 25b