@##/ /rgya gar skad du/ shrI ma hA mu drA ti la kaM nA ma ma hA yo gi nI tan+t+ra rA dza a d+hi pa ti/ bod skad du/ dpal phyag rgya chen po'i thig le zhes bya ba rnal 'byor ma chen mo'i rgyud kyi rgyal po'i mnga' bdag /dpal phyag rgya chen po'i thig le la phyag 'tshal lo/ /bcom ldan mkha' 'gro
ye shes nyid/ /gsang pad snying po'i kha 'byed pa/ /gsang pad lte ba'i nang na bzhugs/ /bdag gis zhu ba khyod gson cig /ye shes rgya mtsho'i kye rdo rje/ /'bum lnga yi ni bdag nyid rgyud/ /gang zhig khyod kyis de nyid gsungs/ /sbyor drug rnal 'byor ma yi gzhung / /thams cad
mkhyen pa dbang phyug mchog /de ni dpa' bo bdag gis shes/ /don dam pa ni ji lta bu/ /de ru bdag ni the tshom skyes/ /char dang thig le tshul dang ni/ /tshul tsam mchog gi mchog gzhan yin/ /sbyor ba drug gis rnam par shes/ /de yi gnas ni gang na yod/ /srog ni gang nas 'byung ba yin/ /
rdo rje 'dzin pa gang du brlag /rdo rje mtshan mo gang nyid ci/ /mtshams gang shar ba gang zhig lags/ /gang du nub pa'i dus dang rtsa/ /mchog gi dbang phyug du tsam mchis/ /dus kyi mtshan nyid gang lags gsungs/ /de yi dus kyis don ci byed/ /A li kA li bya ba gang / /mnga' bdag gang
nas 'byung ba lags/ /ro yi bye brag du zhig bstan/ /dga' ba yang ni de bzhin no/ /gang gi dus kyi dga' ba rnams/ /rdo rje dbang phyug 'byung ba gsungs/ /chos kyi dbyings ni ji ltar bshad/ /rdo rje yang ni ji ltar bstan/ /bdag gi sgra ni ji ltar gsungs/ /gsang ba zhes bgyi ji ltar
lags/ /mchog ces bgyi pa ji ltar bshad/ /dgyes pa'i don ni gsal bar mdzod/ /rigs kyi bye brag tu tsam bstan/ /phung po la sogs skye mched ci/ /tshangs dang khyab 'jug drag po dang / /dbang phyug rtag tu zhi ba dang / /gang nas 'byung zhing gang du gnas/ /chen po'i chen po
de ji ltar/ /phyag rgya'i bye brag du zhig bshad/ /phyag rgya chen po ji ltar lags/ /mgon po mchod pa'i bye brag ci/ /de ru me tog ji ltar yin/ /mgon po chen po mchod sbyin ni/ /ji lta bu zhig 'tshal ba lags/ /mchog gi dngos po'i dkyil 'khor ni/ /bcom ldan 'das de ji lta bu/ /

65b - 66b