gsang ba 'di ni ji lta bur/ /rjes su dpag pas bsam par bya/ /ji ltar yi ge'i dbyibs su ni/ /phyin pa yi ni ye shes nyid/ /gzhan du bcom ldan sgra ji ltar/ /lha zhes bya ba ji ltar lags/ /sangs rgyas kun gyi nges don ci/ /mnyam par sbyor ba ci
zhes bgyi/ /mkha' 'gro ma ni gang gi ming / /dra ba ji lta bu zhig lags/ /sdom pa zhes bya ci zhig bshad/ /de bzhin spyad par dka' ba nyid/ /khyod kyis 'dod chags med gsungs ci/ /chags bral med pa de bzhin gzhan/ /dbu ma zhes bya gang gi
ming / /bud med kun gyi sgyu ma ci/ /stong nyid gzugs khams la sogs pa/ /ci zhig bshad cing mnyam nyid sbyor/ /dang po rnam pa drug 'gyur dang / /sna tshogs pad+mar bris sku dang / /A li kA li phyag rgya che/ /de nyid med sems rnal 'byor dang / /de nyid
bzang po ji ltar lags/ /rnal 'byor nyid la mnyam gzhag dang / /phyi rol drag kyang yang dag bshad/ /zla ba nyi ma rdzogs sangs rgyas/ /'byung ba ji lta bu zhig lags/ /bris pa dang ni ma bris pa'i/ /dkyil 'khor ji ltar gzhag par bgyi/ /de
bzhin sngags dang rgyud nyid dang / /gsang ba'i gnas ni mi 'tshal zhing / /pad+ma bzhi ni khyad par du/ /bdag dang bdag gi ji ltar lags/ /de bzhin sems dang sems byung nyid/ /sems kyi ngo bo ye shes gsungs/ /de bzhin rnam par shes pa nyid/ /
rgyu dang 'bras bu'i dngos po dang / /de bzhin chos dang chos can nyid/ /chu bo'i rgyud ni ci zhes bshad/ /rgya mtsho yang ni khyad par du'o/ /sna tshogs nyid ni khyod gsungs na/ /mang po ji ltar 'thob mi 'gyur/ /rnam shes ye shes khyod kyis gsungs/ /de bzhin
bcud kyis len nyid dang / /g.yon brkyang la sogs ci lags dang / /gzhu yis rnam rgyal de bzhin gzhan/ /gtso dang gtso min sgra ci lags/ /brtag pa yang ni ci zhig gsungs/ /byang chub chen po'i chos rnams ni/ /sum cu rtsa bdun nang gi dang / /

159a - 160a