'gyur ro// dge dang ldan pas sdig pa spong // nyon mongs zad pas mya ngan 'da'// sdig pa thams cad mi bya ste// dge ba phun sum tshogs par spyad// rang gis sems ni yongs su gdul// 'di ni sangs rgyas bstan pa yin// lus kyi sdom pa legs pa ste// ngag gi sdom pa'ang legs pa yin// yid
kyi sdom pa legs pa ste// thams cad du ni sdom pa legs// kun du bsdams pa'i dge slong ni// sdug bsngal kun las rab tu grol// ngag rnams bsrung zhing yid kyi rab bsdams te// lus kyi mi dge ba dag mi byed cing // las lam gsum po 'di dag rab sbyangs na// drang srong gsungs pa'i
lam ni thob par 'gyur// sangs rgyas rnam gzigs gtsug tor thams cad skyob// 'khor ba 'jig dang gser thub 'od srung dang // shAkya thub pa gau tam lha yi lha// mi 'dul kha lo sgyur ba bla na med// 'jig rten mgon po skyob pa mchog/ sangs rgyas dpa' bo bdun po dag/ grags ldan rnams
kyi so sor thar// 'di ni rab tu rgyas par bton// 'di la sangs rgyas rnams dang gang // sangs rgyas nyan thos rnams kyang gus// 'di la gus dang bcas gyur pas// 'dus ma byas pa thob par gyis// brtsam par bya zhing 'byung bar bya// sangs rgyas bstan la 'jug par bya// 'dam bu'i khyim na glang chen bzhin//
'chi bdag sde ni gzhom par bya// gang zhig rab tu bag yod par// chos 'dul 'di la spyod 'gyur ba// skye ba'i 'khor ba rab spangs nas// sdug bsngal tha mar byed par 'gyur// phan tshun tshul khrims bsrung ba dang // bstan pa 'phel bar bya ba'i phyir// so sor thar pa 'di bton pas// dge 'dun gyis ni gso sbyong
byas// gang gi phyir ni mdo bton dang // gang phyir gso sbyong byas gyur pa// tshul khrims de ni bsrung bya ste// g.yag rnga'i rtse mo ji bzhin no// so sor thar pa bton pa yi// bsod nams grub pa gang yod pa// des ni 'jig rten ma lus pa// thub dbang go 'phang thob par shog/ so sor thar pa'i
mdo rdzogs // // dbang phyug dam pa'i mnga' bdag dpal lha btsan po'i bka' lung gis 'phags pa gzhi thams cad yod par smra ba'i 'dul ba 'dzin pa slob dpon dzi na mi tra dang / zhus chen gyi lo tsA ba ban de cog ro klu'i rgyal mtshan gyis bsgyur cing zhus te gtan la phab pa// //

20a - 21a